Неоправдани се стравувањата кај некои тутунари дека ќе има измена на законот за испкаќање на субвенциите за пријавени површини и за зелена нафта, уверуваат од Сојузот на тутунски здруженија. Оттаму тврдат дека директните плаќања од државата си остануваат исти, согласно задолжителното електронско обележување на обработливите површини.
„Тоа е за да можат да ги обележат површините за да можат да ги пријават за субвенции за површина и за зелена нафта. А останува истото, значи нема никакви измени и субвенцијата за не по договорено, туку по предадено кило. Така што, тутунарите да не се секираат, се’ ќе им биде во целост исплатено. Тие што имаат обележано површини ќе добијат плус за зелена нафта и површина, и по предадено кило“, – дециден е Кире Ристески, претседател на Сојуз на тутунски здруженија.
Од Сојузот, исто така, уверуваат дека за ланската реколта, субценциите по оваа основа, ќе бидат исплатени до почетокот на мај, што е во согласност со законските рокови. А истите правила ќе важат и за оваа реколта, а додека за наредната 2026/2027 година, Министерството ќе ја донесе Програмата за директните исплаќања на државата во следниот јануари. Напоредно со се’ ова, течат и продолжените рокови за потпишување на договорите.
„Министерството го продолжи рокот за пријавување за потпишување договори до 9 април, заради тоа што од почетокот на март месец имаше проблем со компјутерите, така што тоа се искомпензира и го продолжија тој рок за пријавување“, – посочи Ристески.
Инаку, што однесува до новите откупни цени, од Сојузот велат дека засега нема некоја промена. Но, тие остануваат на ставот да притискаат за со анекси на договорите, предложените цени сепак да се зголемат, особено со кризата на Блискиот Исток, бидејќи се очекува дека и цените на репроматеријалите ќе бидат повисоки. А тоа, без повисоки откупни цени, би го направило тутунопроизводството нерентабилно, иако годинава има зголемен број и на склкучени договори и на обработливи површини.
