Кандидатот за градоначалник на Општина Дебрца од редовите на ВМРО-ДПМНЕ, Златко Силјаноски, ја заокружува својата предизборна кампања – ветувајќи проекти насочени кон развој, инвестиции и подобар живот за сите жители на општината.
Силјаноски порача дека Дебрца заслужува вистинска промена – општина која се развива рамномерно, со грижа за граѓаните и создавање услови за достоинствен живот.
Клучните приоритети на неговата програма се подобрување на условите за претприемачите и земјоделците, со цел поттикнување на локалниот економски развој и отворање нови работни места, редовен и функционален јавен превоз, кој ќе го олесни секојдневното движење на граѓаните, изградба на нови игралишта, спортски сали и терени, како и финансиска поддршка за младите и спортските клубови.
Силјаноски најави и пакет на социјални и семејни мерки кои, како што рече, ќе бидат директна помош за граѓаните на Дебрца и поттик за останување и создавање семејства во општината: 50.000 денари еднократна помош за млади брачни парови, 10.000 денари еднократна помош за секое запишано прваче, 100.000 денари еднократна помош за трето дете, 100.000 денари помош и ослободување од комуналии за изградба на семејна куќа за жителите на општина Дебрца.
Меѓу најавените проекти е и реконструкцијата на спортското игралиште во Мешеишта, за кој проект, како што истакна, документацијата е целосно подготвена.
“Ова не е само реконструкција на игралиште – ова е инвестиција во младите, во спортот и во здравиот живот во нашата општина. За Мешеишта. За Дебрца. За иднината,“ нагласи тој, додавајќи дека реализацијата ќе започне веднаш по преземањето на функцијата, во соработка со Министерството за спорт.
