Градоначалникот на општина Штип Иван Јорданов денеска оствари прием на Дамјан Давков, штипскиот генијалец кој освои златен медал на првата Европска математичка олимпијада (ЕМО), одржана во Вилнус, Литванија. Во соопштението од општина Штип се наведува дека при приемот, градоначалникот Јорданов упатил искрени честитки за постигнатиот извонреден успех, истакнувајќи дека освоениот златен медал претставува големо признание за трудот, знаењето и посветеноста на младиот ученик.
Тој нагласи дека ваквите достигнувања претставуваат значајна промоција на општина Штип и на Република Македонија на меѓународно ниво, како и потврда за квалитетот и потенцијалот на младите луѓе од општината во областа на науката и образованието. Градоначалникот подвлече дека Општината останува посветена на континуирана и системска поддршка на талентираните ученици, преку создавање услови за нивен развој, поттикнување на нивните успеси и обезбедување различни форми на наградување и поддршка.
Јорданов вели и дека вложувањето во младите, особено во оние кои постигнуваат врвни резултати, претставува директен придонес во иднината на општеството.
Инаку, со овој успех, Дамјан Давков се најде на врвот меѓу најдобрите натпреварувачи, освојувајќи ја титулата севкупен победник на првата Европска математичка олимпијада.
