Секое петто дете е жртва на сексуално насилство или вознемирување. Во периодот од 2020 до 2024 година до МВР биле пристигнати 508 пријави за насилство и вознемирување на деца. Според податоците, 186 деца под 15 години биле силувани, 99 деца биле жртви на полов напад, 44 деца биле принудени да гледаат сексуални дејствија, а 18 – порнографски материјали прикажани од возрасен.
Од Комисијата за спречување од дискриминација велат дека досега немало пријави до нив од страна на ученици, наставници и родители за ваков тип насилство. Причините се страв и незнаење да се пријави навреме.
„Досега до Комисијата нема поднесоци за сексуално вознемирување и сексуално насилство врз деца. Можеби тоа е поради ниската свест во општеството или стравот да се пријавува, но сепак оваа кампања ја има токму таа цел – да го подигне нивото на свесност во општеството за постоењето на сексуално вознемирување и сексуално насилство, да се препознава и соодветно да се пријавува. Комисијата постапува во случај кога институциите затајуваат. Значи, Комисијата мора прво да почека разрешница од институциите кои се надлежни да постапуваат во овие случаи, а потоа, доколку има прекршување на право или несоодветна заштита, да интервенира.“, изјави Душан Томшиќ, претседател на Комисија за спречување од дискриминација.
Претставниците од ЕУ за правата на децата велат дека дискутирањето за сексуалното насилство и последиците врз жртвата е тешко, но доколку гласно се зборува, може да има значителни промени во општеството.
„Заедно со мојот тим експерти работиме со јавни институции за подигнување на свесноста за човековите права и нивна заштита. Особено се занимаваме со спречување дискриминација и насилство врз основа на пол, ефикасна реинтеграција и ресоцијализација на сторителите во општеството и заштита на правата на децата. Денешниот настан е почетна точка за кампањата ‘1 од 5’ за запирање на сексуалното насилство врз децата, која беше развиена од Советот на Европа и имплементирана во многу земји-членки. Материјалите за кампањата беа преведени на македонски и албански јазик од нашиот проект, со финансиска поддршка од ЕУ.“, изјави Барбара Лигл, лидер на компонентата за фундаментални и човекови права
Во склоп на проектот, од јануари следната година ќе се вршат обуки со психолози и наставници меѓу учениците во сите основни училишта во Македонија.
Давид Крстевски
