Четвртиот ден од војната на Блискиот исток донесе и кинеска поддршка на Техеран. Кинескиот министер за надворешни работи Ванг Ји, го охрабри иранскиот колега Абас Арагчи да опстои во одбарана на земјата.
Во меѓувреме, израелски ракети го погодија претседателскиот кабинет во Иран, а израелските војници влегоа во јужен Либан во пресметка против Хезболах. Од друга страна иранските беспилотни летала ја погодија американската амбасада во Ријад. Техеран продолжи со силни одмазднички напади врз Заливот и Израел, а и официјално го затворија ормутскиот теснец, заканувајќи се дека „секој брод што ќе се најде таму ќе биде запален“.
Америка и Израел ја погодија иранската подземна нуклеарна централа во Натанц со ракетен напад.
Американскиот државен секретар Марко Рубио, порача дека целта е да се уништи иранската морнарица, системите за балистички ракети и производство на дронови.
„Во моментов, не сме подготвени за копнени сили, но очигледно претседателот ги има тие опции. Во моментов, нашиот фокус е на уништување на нивните лансери за балистички ракети, нивните залихи на балистички ракети и нивниот капацитет за производство на балиситчки ракети како и нивните еднонасочни дронови за привлекување и нивната морнарица поради заканата што ја претставуваат за глобалниот превоз“, изјави Државниот секретар на САД Марко Рубио.
Франција и Германија ги засилуваат своите единици на Блискиот исток, а Грција веќе испрати дополнителна поддршка на Кипар. Германија оцени дека Иран не е закана само за Израел и регионот, туку и за Европа и Германија.
Иранското министерство за надворешни работи ги предупреди европските земји да не учествуваат во американско-израелската кампања против Исламската Република.
„Секој таков чин против Иран би се сметал за соучесништво со агресорите. Тоа би се сметало за чин на војна против Иран“, изјави Есмаил Бакаи, портпарол на министерството за надворешни работи на Иран.
Америка им нареди на владините службеници и нивните семејства да ги напуштат дипломатските претставништва во Катар, Кувајт, Бахреин, Ирак и Јордан.
