Потреба од едукација за здраво мајчинство, здрава бременост како и унапредување на менталното здравје на локално ниво се заклучоците на граѓанските организации во рамки на проектот за унапредување на перинаталното здравје, во периодот кога жената е бремена или тукушто родила. За време на проектот, само за 24 часа психолошка помош побарале 150 жени со деца на возраст од една година. Според анализите на организациите, податоците се загрижувачки, има голем број случаи на анксиозност, депресија, а кај некои случаи дури и самоубиствени нагони. Затоа е потребно координирано да се дејствува системски: и здравствените и социјалните институции.
-Жените немаат доволно информации и голем дел од нив за прв пат преку овој проект успеаја да слушнат информации поврзани со напредување на нивното ментално здравје, како за време на бременоста така и по породувањето. За жал менталното здравје е сеуште табу тема и жените кои што страдаат од овие проблеми сметаат дека е тоа изолирано дека се случува само кај нив–истакна Борјан Павловски- граѓанска организација ЕСЕЕ
Овој проблем сеуште не е препознаен како дел од целокупното здравје на една индивидуа и покрај тоа што се знае дека жените или младите мајки се поподложни на депресија и ансиозност.
-Она што го идентификувавме како проблем е дека дури и ако постои препознавање нема јасна патека на грижа за тоа каде мајката може да се обрати и каде може да најде психосоцијална поддршка во заедницата– истакна Ана Бојчевска Митревска- граѓанска организација Реактор
На светско ниво една од пет жени се соочува со постпородилна депресија.
