Бројот на заболени од рак на кожа расте, а болеста се почесто се појавува кај помладата популација. Причините, според лекарите се прекумерната изложеност на сонце, користењето солариуми и недоволната фотозаштита. Алармираат за почести прегледи и внимателно изложување на сонце.
„Случувања во природа и навики на млади, солариуми и изложеност на сонце, фотопротекцијата треба да започне од нулта возраст. Се поретко граѓаните доаѓаат доцна, со текот на годините се усповременивме, на клиниката имаме најсофистициран апарат за поставување на дијагноза.“ – вели дерматологот Силвија Дума.
Стотици граѓани денеска го посетија Градскиот Парк и ја искористија можноста за бесплатен дерматолошки преглед. Месецот мај е посветен на превенција и рано откривање на кожните карциноми, а по тој повод во центарот на градот граѓаните имаа можност да се едуцираат, да си ја проверат својата кожа и да се запознаат со ризиците од овие болести. Она што е позитивен сигнал е дека свеста кај населението значително се зголемува.
„Има, голем број, ме радува тоа што пациентите се освестени, ја постигнуваме целта, да ја подигнеме свеста за раното откривање и детекција на било какви сомнителни промени со посебен акцент на кожните карциноми и секако ги информираме и ги упатуваме во нашите институции за понатамошен третман.“ – вели дерматологот Зорица Зафирович.
„Овој месец мај е во него се случуваат предупредувања за меланом и ова е глобален проект, бројките се се поголеми, секоја година расте бројот на заинтересираност, имавме откриено неколку случаи токму на ваквите акции, последните 20 години доста е крената свеста и луѓето се проверуваат и без некаква причина.“– вели Дума.
На прегледите досега биле прегледани повеќе од сто пациенти, а кај дел од нив биле забележани сомнителни промени кои ќе треба дополнително да се следат и третираат.
„Има и такви кои што прв пат се соочуваат, но има и информирани пациенти. Ние сме тука за нив, да следиме за понатамошен развој и дали се работи за типична или малигна промена.“– вели Зафирович
Кампањата „Еуромеланом“ е дел од европска иницијатива чија цел е промовирање на превенцијата, раното откривање, информирањето и подигнувањето на свеста за опасностите од кожните болести со посебен акцент на малигниот меланом.
