„Не троши еден млад брачен пар како еден пар пензионери, затоа промени во пресметувањето на потрошувачката кошничка мора да има,“ рече премиерот Христијан Мицкоски.
Ваков е ставот на првиот човек на Владата во врска со новите податоци за синдикалната кошничка, која за месец септември изнесува 65.077 денари – што е за 430 денари помалку во споредба со август. Тој потенцира дека не може со една бројка да се мерат сите категории во општеството.
„Мораме како втора пресметка да направиме кошничка за самец, млад брачен пар, за трочлено, четиричлено семејство, но и за пензионери. Зашто, потребите на младите брачни парови не се исти со оние на пензионерите, исто како што животот на едно лице не може да се спореди со семејство со деца. Затоа не смееме една потрошувачка кошница да ја третираме како универзална и да ја наметнеме за сите. Само ако ги имаме овие параметри, ќе можеме да носиме поквалитетни и пообјективни одлуки при креирањето на политиките.“
Мицкоски објасни дека за ова прашање веќе се разговара со Министерството за економија, Министерството за труд и Државниот завод за статистика. Целта е преку консултации и усогласување да се изработи унифицирана потрошувачка кошничка, која ќе биде пообјективна и ќе одговара на реалните потреби на граѓаните – од млад брачен пар, до пензионери.
Во врска со цените во маркетите, посочи дека институциите веќе спроведуваат мерки за заштита на потрошувачите. Државниот пазарен инспекторат и Комисијата за заштита на конкуренцијата секојдневно се на терен, со редовни контроли во супермаркетите. Премиерот потсети дека има и покренати постапки против трговци кои ги прекршиле правилата.
Како позитивен пример за цените беше посочена акцијата со училишната кошничка пред почетокот на учебната година, кога цените на голем број производи што ги користат учениците беа намалени.
Дека има позитивно раздвижување на македонската економија , Мицкоски се осврна на инфлацијата, вели дека трендовите се охрабрувачки.
„За прв пат после многу месеци и базичната инфлација, но и цените на прехранбените производи на месечно ниво имаат негативни параметри.Очекувам во месеците што следат овој тренд да продолжи, а во текот на следната година инфлацијата да се стабилизира на природно ниво меѓу 2 и 3 проценти. Тоа е целта што ја поставуваме како влада – да имаме стабилна економија, предвидливи цени и граѓани кои ќе можат полесно да го планираат својот семеен буџет.“
Ова, според него, ја става Македонија во подобра позиција од некои земји во регионот и дел од Европската Унија. Така, во август инфлацијата во Хрватска изнесувала 4,6%, а во Романија 6,8%, додека кај нас се бележи тренд на намалување.
Премиерот порача дека Владата нема намера да прави спектакли од економските мерки, туку ќе продолжи со системски пристап – преку унифицирана кошничка, постојани контроли и таргетирани акции. „Само така,“ рече тој, „ќе обезбедиме стабилни цени, заштита на стандардот и предвидлива економија за секој граѓанин. Инаку агенцијата за кредитен рејтинг „Фич“ го потврди кредитниот рејтинг на Македонија. Ова значи дека земјава и натаму важи за стабилна во економски поглед и дека има доверба кај меѓународните финансиски пазари. Во извештајот се наведува дека доследната економска политика, фиксираниот девизен курс и подоброто управување се главните причини за стабилноста.
