Најдоцна за една недела ќе биде познат исходот од интензивните преговори помеѓу тутунарите, откупувачите и Министерството за земјоделство кои се водат преку посебно работно тело формирано од ресорниот министер. Барањата се веќе дефинирани и очекувањата се дека истите ќе бидат во интерес и на тутунарите, и на откупувачите, а и на државата, уверуваат од Сојузот на тутунски здруженија.
„Бараме некои договори за да го стандаризираме производството на околу 20-22 милиони тутун и самите производители да бидат заинтересирани да склучуваат договори. Имавме неколку точки и за измена на Законот за тутун во ова работно тело, а како предлози од нас се дадени и забрана за увоз на ароматичен суров тутун, враќање на ингеренциите на Сојузот – без согласност на Сојузот да не можат да потпишуваат, односно да договараат цени и договори, и баравме измена на членот од Законот за полагање на лиценци“, вели Кире Ристески, претседател на Сојузот на тутунски здруженија.
Откупот на тутунот од ланската реколта завршува на крајот од месецов. Според проценките досега се откупени околу 95 проценти од ланскиот род, кој се очекува вкупно да тежи над 24 милиони тони, а за откуп има останато најмногу 50-тина тони. Ристески уверува дека сиот останат тутун кој е квалитетен, ќе биде откупен во законскиот рок за откуп.
„Секојдневно сме во контакти и со откупните компании за да го купат тутунот. Меѓутоа, компаниите го откупуваат само сувиот тутун. Значи, влажен тутун, недосушен тутун – не купуваат.За тоа дека откупуваат во класи и ние имаме сознанија, но тоа е во согласност со кооперантот“, објаснува Ристески.
Што се однесува пак, до интерсот за прозводство на тутун во престојната реколта, тутунарите велат дека е на задоволително ниво. И кај нив, а и кај откупувачите. Ова, особено што цената на родот од ланската реколта, достигна и до 500 денари по килограм тутун, кој се ценеше претежно во прва класа.
„Од новата реколта очекуваме да не падне под годинашната цена. Очекуваме дека ќе постигнеме повисока цена. Има интерес за нови склучувања на договори, оттука ќе се дижи околу 20- 22 милиони килограми новата реколта. Во зависност од цените кои ќе ги понудат откупувачите – дали ќе одат по класи. Ние бараме да се врати нормалната проценка, но со зголемување на цените“, кажа Јусуф Ибраими, тутунар од с. Житоше.
Изготвените барања од страна на Сојузот, викендов ќе бидат разгледани од Извршниот одбор, по што ќе бидат доставени и до двата партнери во овој процес.
Каролина Дурло
