🎥 Само неколку неизвесни битки на локалните избори- дали СДСМ ќе ги загуби и своите главни бастиони?!

Центар, Карпош, Струмица, Чаир. Тоа се местата каде што можеме да очекуваме неизвесна битка на локалните избори. Во другите општини, како и градот Скопје работите се помалку или повеќе јасни, владејачката ВМРО-ДПМНЕ има драстично поголема предност пред своите противници. Според познавачите граѓаните ќе дадат голема поддршка за актуелната централна власт, а големиот пад на рејтингот на партијата на Венко Филипче, ги доведува во опасност социјалдемократите да ги загубат и скопските општини кои важеа за нивни бастиони.

-Главната битка ќе се води за општина Центар, ќе биде битка за општина Карпош. Мислам дека помалку или повеќе во другите, па еве можеби и Шуто Оризари, во зависност од кој ќе бидат кандидатите, во останатите градски скопски општини мислам дека битката е помалку однапред јасна, затоа што кандидатите на ВМРО-ДПМНЕ на сите анкети се говори дека имаат значајна, исклучително голема предност, изјави Александар Ристевски.

За главен бастион на СДСМ веќе две децении важи Струмица, од каде доаѓа и нивниот поранешен лидер Зоран Заев. Сепак работите се многу покомплицирани за овие избори. Кандидат на партијата за градоначаник е Марјан Даскаловски, иако бројките многу поголема предност му даваа на актуелниот прв човек на градот Костадин Костадинов. Според познавачите внатрепартиските превириња во струмичкиот огранок на СДСМ, може да им се удрат од глава.

-Може да се случи за прв пат после долго време, после речиси 20 години СДСМ да го загуби тој град. Така да и тука ќе биде една интересна битка, каде што ќе видиме понатаму, пак ќе кажам многу зависи и од кандидатите, затоа што сите анкети покажуваат дека на локалните избори покрај тоа што се гласа за програма и политичка партија, многу често одлучува и самиот кандидат, изјави Ристевски.

За овие избори промена во приоритетите има и кај албанскиот политички блок. Ако до минатите избори Тетово важеше за главната битка, сега според измињата тоа е Чаир. И ДУИ и Вреди во битката влегуваат со т.н. тешкаши. Ахмети ќе оди со својот партиски претседател и поранешен министер за надворешни работи Бујар Османи, додека големи се шансите Вреди да оди со Изет Меџити. Според Александар Ристевски, ќе треба да се види дали Османи, кој досега немал искуство на локално ниво ќе може да се носи со Меџити кој важи за политички теренец.

-Ќе видиме како во изминатите години таа превласт што таа структура која што порано беше во ДУИ, а сега се може да се каже како главни во делот на Вреди, делот на Изет Меџити, како ќе се справат со еден лик кој е експонент на партијата ДУИ како што е Бујар Османи, кој пак досега нема никакво искуство ниту со локална власт, ниту со локална политика, туку бил цело време именувам функционер, изјави Ристевски.

Кога градот во прашање таму битката ќе ја водат Орце Ѓоргиевски од ВМРО-ДПМНЕ и Каја Шукова од СДСМ, свои кандидати ќе имаат и ДУИ и Вреди, а најавија и Левица и Зелен хуман град. Според познавачите бројките велат дека голем фаворит е Ѓоргиевски, кој дури можеби би победил и во првиот круг.

Матеја Петровски