Американскиот претседател Доналд Трамп објави видео од синоќешните американски напади врз иранските воени цели на островот Харг, во северниот дел на Персискиот Залив. Видеото прикажува напади врз воена база, вклучувајќи напади врз пистата на воздухопловната база, како и неколку други локации на островот.
Цел на нападите биле и противвоздушни одбранбени системи, како и можни позиции на ракетни системи што ги користи Иранската револуционерна гарда.
Островот Харг, низ кој минуваат околу 90 проценти од извозот на нафта на Иран, се смета за најчувствителна економска цел во земјата. Харг е корален остров во Персискиот Залив, долг осум километри и се наоѓа на 43 километри од иранскиот брег. Поголемиот дел од брегот на Иран е премногу плиток за најголемите танкери за нафта, но островот Харг е блиску до длабокото море.
Обично, помеѓу 1,3 и 1,6 милиони барели нафта дневно минуваат низ островот Харг.
