Незапаметена бура ги зафати САД. Изобилните снежни врнежи и ниските температури оставија милиони домаќинства без електрична енергија. Вонредна состојба е прогласена во 23 држави, од југ до североисток. Температурите на места се движат од минус 20 до минус 30 степени.
Во прекин е патниот и воздушниот сообраќај, а над 17.000 летови беа откажани. Приватен авион со осум лица се урна при полетување во Мејн. Училиштата во поголемите градови останаа затворени, а засолништата работат со полн капацитет.
Опасно ниските температури се очекува да траат најмалку до почетокот на февруари. Властите соопштија дека станува збор за најстудената зимска бура во последните години, а екстремниот студ веќе ги зеде првите жртви. Упатен е апел до граѓаните да останат дома и да избегнуваат патувања.
Додека температурите под нулата се вообичаени во северните држави како Дакота и Минесота, овој вид студ е невообичаен за Тексас, Луизијана и Тенеси, каде што температурите паднаа за 15 до 20 Целзиусови степени под сезонскиот просек. Експертите објаснуваат дека причината за екстремното време е поларниот вртлог од силен ветер над Арктикот.
