Од училишните дворови и улица, до социјалните мрежи. Насилството сè почесто се сели во виртуелниот свет. Анализите покажуваат пораст на сајбер насилството за над 30 проценти, а најчеста мета се девојчињата. Експертите предупредуваат на сериозни последици по менталното здравје. Бројките го вклучија алармот. Во Штип почнуваат обуки за наставниците за навремено препознавање и спречување на врсничкото насилство.
За повеќе од 30% е зголемено сајбер насилството, покажуваат анализите, а состојбата станала алармантна по завршувањето на ковид-пандемијата. За разлика од другите форми на насилство, жртвите на интернет можат да бидат изложени на малтретирање 24 часа на ден. Најчеста мета се девојчињата, кои се соочуваат со закани, ширење на лажни информации и злоупотреба на лични податоци.
„Ако е физичко насилство, ќе се видат модринки или нешто што е видливо, но кај сајбер насилството или психичкото, или емоционалното насилство има страшни последици по жртвата, а тоа е губење на самодоверба, затворање во себе, станување интровертна личност, неможност да се соочи со средината“, изјави проф. д-р Татјана Стојановска Иванова.
За полесно препознавање и спречување на врсничкото насилство, Штип е меѓу првите градови во државата каде психолози и социолози ќе спроведуваат обука на наставниот кадар во средните и основните училишта. Целта е наставниците навреме да ги препознаат знаците на насилство меѓу учениците.
„Имаме обврска како локална самоуправа да создадеме средина во секое училиште која ќе биде основа за развој на секој ученик, средина која ќе овозможи секој ученик да го искористи својот потенцијал што го поседува и да се чувствува безбедно и сигурно“, изјави градоначалникот на Штип, Иван Јорданов.
Според социолозите и психолозите, последиците од сајбер насилството допрва ќе се чувствуваат кај младата популација. Тие предупредуваат дека ваквиот вид насилство може да остави долгорочни последици врз менталното здравје. Според нив, еден од најважните чекори е насилниците веднаш да се пријават во полиција.