Уште едно деноноќие во Украина го одбележаа серија руски напади. Жртви и повредени има по нападите во Одеса и Харков. Главниот град Киев одново ноќеска беше нападнат со балистички проектили. Проблеми има во снабдувањето со електрична енергија и затоплувањето. Речиси секојдневно на удар е и железничката инфраструктура, но земјата успева да ја одржи клучната логистика.
И Русија нотира проблеми во снабдувањето со струја и вода по украински напади. Гувернерот на Белгород објави дека делумно е вратено затоплувањето. Украинскиот министер за надворешни работи Сибиха повика на состанок на лидерите за решавање на најтешките прашања во мировните преговори и нагласи дека само американскиот претседател Трамп може да ја запре војната. Зеленски претходно изјави дека САД предложиле војната да заврши пред летото бидејќи Американците подоцна ќе имаат поинаков приоритет – изборите за Конгресот. Тој, исто така, потврди дека територијалното прашање и прашањето за нуклеарната централа во Запорожје останале нерешени за време на разговорите во Абу Даби.
