Министерот за правда Јетон Шасивари оствари средба со словачката амбасадорка Ивета Хрицова на која ја истакна значајната улога на Република Словачка во процесот на нашата европска интеграција, особено преку активностите на Словачката асоцијација за надворешна политика, која придонесува кон развојот на Националната конвенција за Европската Унија.
Националната конвенција за Европската Унија, информираат од прес-службата на Министерството за правда, претставува важен форум за отворен и транспарентен дијалог за прашања поврзани со нашите пристапни преговори за членство во Европската Унија.
Искуствата од успешното функционирање на ваков механизам во Словачка се препознаени како добра практика во процесот на приближување кон Европската Унија и модел кој придонесува за создавање широк општествен консензус околу европските реформи.
Соработката меѓу Министерството за правда и институциите на Република Словачка ќе продолжи и во наредниот период, со цел дополнително јакнење на евроинтегративниот процес и унапредување на европската перспектива на нашата држава.
