„Предвреме роденото бебе не е исто што и навреме роденото. Тоа со месеци може да биде во инкубатор, а по доаѓањето дома, мајката најпрвин треба да го научи да не јаде преку сонда.“ Ова е само еден од предизвиците со кои се соочуваат мајките на овие мали борци. Како што велат, предизвиците се многубројни, поради што им е потребна поголема и континуирана поддршка од сите, како и продолжување на породилното отсуство.
„Државата и работодавачите навистина би можеле да сменат и да поддржат некаква промена на законот, за бебињата кои остануваат долго во инкубатор, и ние секогаш инсистираме тие мајки да останат подолго дома, бидејќи тие мајки се враќаат без бебе… Детето може да се врати кога мајката треба да оди на работа, значи девет месеци да лежи во инкубатор… Кога нормалните дечиња проодуваат, ние, мајките на прерано родени деца, ги учиме да јадат без сонда“, изјави Данче Оклеска – Илиоски, мајка на предвреме родено бебе.
Причините за сè поголемиот број предвреме родени деца може да бидат различни — од бурниот модерен живот, преку подоцнежното станување мајка, па сè до неконтролираните бремености, посочуваат од прилепската болница. Од вкупно 400 до 500 новородени деца годишно, околу 30 до 40 се раѓаат предвреме.
„Првин бурниот живот, понатаму имаме проблем од страна на мајката, болести, па можеби и неконтролирани бремености, без разлика од какви причини. Јасно, и проблеми од детето — може да има некои аномалии, инфекции. Причините се многубројни. Се трудиме да се превенираат со колегите гинеколози-акушери, а понатаму ние да ги згрижуваме, лекуваме и следиме“, изјави д-р Лилјана Христоска, неонатолог-педијатар во прилепската болница.
Неонатолошкото одделение во прилепската болница може да се носи со овие предизвици, и кадровски и со постојната опрема. Сепак, набавката на нови апарати секогаш е добредојдена, велат од одделението. Затоа донациите од општествено-одговорните компании, организации и здруженија се од големо значење.
„Оваа година донираме апарат ‘пациент-монитор’, кој е наменет за најмалите, најхрабрите борци — предвреме родените дечиња. Служи за следење на виталните параметри на новороденчињата“, истакна Билјана Кузманоска, пратеничка и претседателка на УЖ ВМРО–ДПМНЕ, Прилеп.
Смртноста кај предвреме родените деца е значително поголема во однос на доносените, поради што стручниот медицински надзор, особено во првата година од животот, е од исклучителна важност.