Претседателот на Собранието, Африм Гаши, на денешниот брифинг со новинарите информираше дека локалните избори треба да се распишат кон крајот на Јули или почетокот на Август.
Тој исто така објави дека е побарано да се одржи јавна расправа во Собранието за предложените измени на Законот за локална самоуправа, кои Министерството за локална самоуправа најавува веќе одреден период.
Гаши ја најави и интерпелацијата за министерот за внатрешни работи, Панче Тошковски, која ќе се разгледува на следната пленарна седница, закажана за 29 април. Интерпелацијата е поднесена од пратеничката група на Левица, а причината за неа е, според нив, грубо занемарување и нестручно извршување на јавната функција од страна на Тошковски, што довело до низа противзаконски дејства и скандали во МВР.
Како што истакна пратеникот на Левица, Сашко Јанчев, оваа интерпелација следува по наводните кадрови поместувања и несоодветни постапки од страна на министерот за внатрешни работи, кои, според Левица, се причина за сериозни неправилности во Министерството.
