Пожарот кој беснееше во текот на ноќта, нешто два часа по полноќ, ги разбуди жителите на Зелениково. За среќа бил навреме забележан, а една од жените која прва го видела, веднаш му јавила на раководителот на главниот штаб за кризи Ангелов и во паника викала дека огнот се приближува кон нејзината куќа, која се наоѓа во последниот ред на ридот над селото.
„Во паника викајќи ме извести дека пожарот се приближува кон нејзината куќа која се наоѓа во последниот ред во село Зелениково. Според паниката во нејзиниот глас знаев дека пријавата е вистинска. Веднаш исклучив и се јавив на дежурниот пожарникар во скопската бригада за противпожарна заштита“, изјави раководителот на главниот штаб за кризи, Стојанче Ангелов.
Во меѓувреме градоначалникот Маневски, не чекајќи некој да го земе противпожарното возило, самиот седнал зад воланот, го стартувал и тргнал на помош кон куќите. Кога стигнал на критичната локација, со доброволните пожарникари и жителите се вклучил во борбата со огнената стихија. Благодарение на брзата реакција пожарот бил запрен пред да стигне до куќите и за среќа, нема човечки жртви ниту материјална штета.
Околу два часот по полноќ изби пожар, одма по првиот повик, интервениравме навремено, со возило на општина Зелениково, пристигнавме на лице место. Дополнително ги повикавме и доброволното противпожарно друштво Зелениково. Со заеднички сили успеавме да го спречиме пожарот да не се рашири до најблиските куќи“, изјави градоначалникот на Зелениково, Коста Маневски.
„Притоа градоначалникот е скромен за да не губи време тој лично се качил во камионот односно во противпожарното возило и го донел овде. Градоначалник секоја чест за твојата постапка, бидејќи да не била твојата брза реакција, мислам дека овде ќе се случила вистинска катастрофа, барем за оние кутри луѓе кои ќе ги изгубеа своите куќи“, изјави раководителот на главниот штаб за кризи, Стојанче Ангелов.
Поради одличната завршена работа доброволните пожарникари од Зелениково ќе станат дел од Огнените тимовите за брз одговор на Дирекцијата за заштита и спасување. Огнот над Зелениково е ставен под контрола, но пожарникарите и натаму имаат полни раце работа на повеќе локации низ земјава. Активни пожари има во Студеничани, Македонски Брод, на подрачјето меѓу Велес и Зелениково, кај Јегуновце и Сарај, во Крушево и во Крива Паланка. Првиот човек на Дирекцијата за заштита и спасување повторно ги предупреди граѓаните да бидат совесни и да не фрлаат отпушоци или да палат оган на отворен простор.