– Во организација на Секторот за образование при Општина Куманово денеска се одржа работен состанок со директорите на основните училишта, претставници на Министерството за образование и наука, УНИЦЕФ, СОНК и локалните институции, на кој беше разгледана состојбата со уписот на првачињата за учебната 2026/2027 година и процесот на оптимизација на училишната мрежа.
Целта на состанокот беше да се анализира моменталната состојба со уписот на учениците во прво одделение за учебната 2026/2027 година, со посебен акцент на формирањето паралелки во прво и шесто одделение. Притоа беа разгледани насоките добиени од Министерството за образование и наука и обврските што произлегуваат од процесот на оптимизација на училишната мрежа во основното образование.
Процесот на оптимизација е започнат во 2023 година од страна на Министерството за образование и наука, во соработка со УНИЦЕФ, со цел поефикасно организирање на наставата и подобро искористување на расположливите ресурси во училиштата.
На состанокот, директорите на училиштата ја презентираа актуелната состојба со уписот на учениците во прво одделение и имаа можност да добијат дополнителни насоки и препораки од претставниците на МОН и УНИЦЕФ за формирање и оптимизирање на паралелките, во согласност со одредбите од Законот за основно образование. Според учесниците, ваквите координациски средби се значајни за навремено планирање на наставниот процес и за обезбедување квалитетни услови за образование на учениците. Во Куманово има 21 училиште, од кои пет средни.
