Факултетот за драмски уметности и Факултетот за музичка уметност во Скопје ќе го промовираат дванаесеттиот број на меѓународното научно списание за изведувачки уметности „Ars Academica“, посветен на современите трансформации на уметничкото творештво и влијанието на новите технологии врз уметноста.
Промоцијата ќе се одржи на Факултетот за драмски уметности, а со настанот ќе бидат одбележани и 11 години од континуираното излегување на списанието, кое претставува заеднички проект на двата факултета.
Новиот број е фокусиран на мултимедиумските практики, дигиталните технологии и вештачката интелигенција, а преку повеќе научни трудови се анализираат промените во уметничките форми, творечките процеси и сфаќањата за авторството во современиот културен контекст.
Во изданието се застапени трудови од авторите Марија Апчевска Петровска, Мимоза Куршумлија, Ѓорче Ставрески, Никола Настоски, Милчо Узунов, Илија Циривири, Ангел Спироски и Биљана Тануровска-Ќулавковски.
Текстовите се поделени во две тематски целини. Првата е посветена на мултимедиумските преплетувања и естетските постапки во филмската и театарската уметност, додека втората ги истражува влијанијата на новите технологии и вештачката интелигенција врз современите уметнички практики.
Списанието „Ars Academica“ е основано по иницијатива на проф. д-р Ана Стојаноска и проф. д-р Соња Здравкова-Џепароска, со цел поттикнување на интердисциплинарен пристап во истражувањето на изведувачките уметности и афирмација на македонската научна мисла во меѓународен контекст.
Организаторите посочуваат дека новина во дванаесеттиот број е неговото печатено издание, покрај досегашната електронска форма, а објавените трудови поминуваат низ рецензентска постапка од домашни и меѓународни експерти.

