Црвениот крст на град Скопје ќе ја одбележи Неделата на грижа за старите лица преку реализација на хуманитарни, здравствено-превентивни, едукативни и рекреативни активности наменети за повозрасните граѓани.
Како што соопштува Црвениот крст, активностите ќе се реализираат во рамки на социјалната услуга „Центар за дневен престој за стари лица за активно стареење и Центар за давање помош во домашни услови“, со цел поттикнување на активното и здраво стареење и поголема социјална вклученост на старите лица.
Во текот на неделата ќе бидат организирани здравствени пунктови за мерење крвен притисок и шеќер во крвта на повеќе локации во Скопје, офталмолошки и ЕКГ-прегледи, физиотерапевтски и фризерски услуги, како и посета на Домот за стари лица „Светла Надеж“, театарска претстава и рекреативна прошетка во Крушево.
Предвидени се и музичко-забавна програма во дневниот престој за стари лица, заедничка подготовка на зимница со ученици од ОУРЦ „Д-р Златан Сремец“, како и хуманитарен базар во Старата скопска чаршија.
Од Црвениот крст посочуваат дека социјалната услуга се реализира со поддршка на Министерството за социјална политика, демографија и млади и Град Скопје, а на месечно ниво опфаќа повеќе од 1.500 корисници во дневните центри за стари лица.
Целта на програмата е развој и унапредување на вон-институционалните форми на грижа и поддршка, намалување на осаменоста и поттикнување на активното учество на старите лица во заедницата.

