Стратешки План дизајниран за да ги задоволи потребите за мобилност на луѓето и бизнисите во градовите и нивното опкружување за подобар квалитет на животот, односно на животната средина. Ова е целта на Проектот од Министерството за транспорт и врски во соработка со странски експерти, а финасиран од Светската банка.
Неговата евалуација треба да започне во ноември, а ќе бидат опфатени пет македонски општини. Главниот фокус на Планот ги интегрира сите начини на транспорт, а не само автомобилите. Комбинација е од инфраструктура, регулација на пазарот, како и политики за промоција, a станува збор за краток и среден временски период, втемелен во долгорочна визија и стратегија.
„Овој План се работи преку Проект на министерството за транспорт и врски, Проект за поврзување на локалните патишта кој е финасиран од страна на Светска банка, а како една компонента од целиот овој Проект е изработка на планови за одржлива урбана мобилност за пет општини во Македонија, и тоа: Прилеп, Кавадарци, Струмица, Струга и Кочани“, – изјави Винета Иваноска, раководител на Одделението за ЛЕР – Општина Прилеп.
Планот, кој е во процес на изработка, опфаќа мноштво компоненти. Во него се вклучени сите општествени чинители кои можат да придонесат за остварувањето на крајната цел: општинската администрација, јавните претпријатија, невладините организации, МВР, спортистите, учениците и секако граѓаните.
„Нашата цел е да поттикнеме што повеќе граѓани да ги променат секојдневните навики со што ќе учествуваат во природен, здрав начин на превоз, со сигурен превоз, одбегнувајќи ги автомобилите, трчање, активирање на сите начини за барање на подобар, безбеден транспорт на патека. Со сето ова можеме да изградиме една подобра животна средина во нашиот град и посигурен начин на живеење“, – истакна Борче Јовчески, градоначалник на Прилеп.
Инаку, сите овие активности се одвиваат во рамките на Европската недела на мобилност 2025“, а во чии рамки во наредните седум дена во Прилеп ќе се одвиваат низа активности за промоција на одржливата урбана мобилност: ден без автомобили, ден со бесплатен градски превоз, орагнизирано возење велосипеди, пешачење и сл.
