Полициски и армиски специјалци и тим од Дирекцијата за заштита и спасување од утринава ја продолжија акцијата за пронаоѓање на 16-годишното девојче кое вчера попладне исчезна во водите на реката Вардар кај селото Уланци во близина на Градско.
Во акцијата се вклучени специјалци на МВР, со чамец и нуркачи, како и армиските „Волци“. На терен е и тим од Дирекцијата за заштита и спасување.
Акцијата за потрага траеше доцна во ноќта, но беше прекината поради немање соодветни услови.
ЦУК вчера попладне добил пријава за две потонати женски лица, на возраст од 16 и 26 години, во Вардар.
Пријавата била поднесена од лице присутно на местото на настанот – сестра на 16-годишното девојче – која, во видно вознемирена состојба, побарала итна помош. Екипите кои излегле на терен, жива ја пронајдоа и извлекоа 26-годишната жена.
