Иако законскиот рок за откуп на тутунот завршува на крајот од февруари, веќе се откупени околу 90 посто од лани производениот род. Годинава тутунот е со одличен квалитет, велат тутунарите, но она што ги фрапира се откупените количини кои досега изнесуваат над 23 милиони килограми и се високо над сите претходни предвидувања од најмногу 20 милиони килограми. Сомнежите се дека отсусутвото на класи и ценењето без никакви одбитоци, си го земаат својот данок на штета на вистински квалитетниот тутун.
„Таа бројка е добиена од влажни тутуни, од неодбивање на калото на самите картони. И сето тоа си ја донесе таа бројка на произведен тутун…Не е коректно, меѓутоа тој начин на откуп го наметнаа самите откупувачи..Ние сме за да се смени начинот на проценка во иднина за да не дојде до ваква анархија на купување на тутун, да се воведат барем класи, да се зголемат цените и да биде реална проценката на тутунот, и да бидат задоволни и тутунопроизводителите, и фирмите кои го купуваат тутунот“, – вели Кире Ристески, претседател на Сојуз на тутунски здруженија.
Освен сомнежите дека во некои од картоните освен некавалитетен тутун, има и песок за да натежне, меѓу тутунарите се шпекулира дека во земјава се откупувал дури и увезен тутун. Но, од Сојузот уверуваат дека тие немаат никакви докази за такво нешто, исто како и што не се сигурни за шпекулациите дека некои од откупните компании еднаш откупениот тутун, по неколку дена, пак им го враќале на одредени тутунари.
„Од нас никој не побарал да интервенираме за вратените количини, меѓутоа дојдена и до нас шпекулација дека дел од откупените тутуни се враќаат. А што се прави понатаму со тие тутуни, не знаеме“, – објаснува Ристески.
Инаку, во пресрет на новата производна реколта, минатата недела, на иницијатива на ресорниот министер, формирано е работно тело со претстваници од Сојузот на тутунски здруженија и од сите откупувачи, со цел навремено утврдување на начините на склучување на новите договори и договарање на откупните цени. Тутунарите велат дека мора да се стави ред во проценката на тутунот каде главен критериум ќе биде квалитетот на родот и согласно тоа и да се вреднува.
