Студентите и работодавачите седнаа на иста маса со цел да ја поттикнат взаемната доверба и градењето на идни одржливи партнерски релации. Под медијаторството на прилепскиот Економски факултет, придобивки од овој пионерски чекор на оваа високо-образовна институција треба да имаат и едните, и другите – студентите стекнуваат компетенции релевантни за пазарот на трудот со што полесно ќе доаѓаат и до работни места, а работодавачите ќе имаат директен увид во реалните знаења и вештини на студентите.
„Бизнис-заедницата е отворена за голема соработка, Факултетот е спремен, и дефинитивно треба да продолжиме да соработуваме. Најголемите компетенции се практичната работа, соработката на реални прокети, реализација на студентски пракси“, – посочи Никола Тумбовски, студент на четврта година.
„Соработка мора да има, бидејќи моментално излегуваат студенти кои не се спремни веднаш да почнат со работа, им недостатуваат вештини“, – рече Катерина Јакимовска – Геровска, работодавач од Битола.
Соработката меѓу академската заедница, работодавачите, студентите и алумните е од особено значење во процесите поврзани со креирање конкурентни студиски програми и студиски програми фокусирани на студентот. Ваквата соработка иницира процеси што водат кон зајакнување на компетенциите на студентите и дефинирање знаења и вештини во согласност со барањата на работодавачите, а базирани на претходни анкетни прашалници.
„За таа цел беше спроведено анкетно истражување во кое што беа вклучени 107 компании и тоа за секоја студиска програма одделно, пришто основната идеја е да се идентификуваат компетенциите, знаењата, вештините кои што треба да ги поседуваат студентите на Економскиот факултет во Прилеп, после нивното дипломирање, преку размена на искуства помеѓу четири групи на стејкхолдери – работодавачи, академска заедница, студенти и алумни на факултетот“, – изјави Татјана Спасеска, декан на Економски факултет – Прилеп.
„Без лажна скромност, можам да кажам дека овој настан е еден од оние историски кои ќе го обликуваат образованието како прв чекор на Економскиот факултет – Прилеп, потоа на УКЛО- Битола, а сигурен сум ќе се прошири и на целокупното високо образование“, – посочи Игор Неделковски, ректор на УКЛО-Битола.
Во оваа насока, годинава, од бизнис-секторот биле одобрени и стипендии за 30 бруцоши на Економскит факултет во Прилеп.
