Во Струмица денеска беше промовиран проектот „Heart Safe CBA – Кон прекугранична област, безбедна за срцето“, кој се реализира во рамки на Програмата за прекугранична соработка Interreg IPA „Грција – Македонија 2021–2027“, со цел зајакнување на соработката меѓу двете земји и унапредување на итната медицинска реакција и здравствените капацитети во прекуграничниот регион.
Според Даниела Мафкова од Центарот за развој на Југоисточниот плански регион, предвидените активности вклучуваат обука на повеќе од 1200 здравствени работници и граѓани, набавка на современа медицинска опрема, како и други мерки насочени кон создавање побезбедна прекугранична област.
-Како Центар за развој на Југоисточниот плански регион ја препознавме важноста на ваквите иницијативи за нашите општини и нивните граѓани. Регионалниот развој не се однесува само на регионалниот развој и инфраструктура, туку и создавање на услови за поквалитетен, побезбеден и поздрав живот, рече Мафкова на денешната прес-конференција.
Според Јован Коцев, директор на Центарот за развој на Југоисточниот плански регион, основна цел на проектот е подобрување на прекуграничната соработка и подобри реакции при давање итна медицинска помош.
-Кога зборуваме за давање итна медицинска помош секоја секунда е важна. Навремената реакција, опремата, како и обучениот медицински прерсонал секогаш знаат да ја направат разликата меѓу животот и смртта, рече Коцев.
Инаку, преку проектот, кој го реализираат Општата болница „Ахепа“ од Солун, Хеленското здружение за итна претхоспитална медицинска грижа од Грција и Центарот за развој на Југоисточниот плански регион, ќе бидат обезбедени 4 нови амбулатни возила, 18 автоматски дефибрилатори, 6 полуавтоматски дефибфрилатори, 6 електрокардиографи и опрема за обука.
Вкупниот буџет за проектот е 1.217.146 евра, од кои од ЕУ фондовите се обезбедени 973.716 евра, а од националните фондови 243.429 евра.
