Патувањето во Европската унија, од 2026-та година, ќе стане – значително поскапо и построго контролирано. Наместо досега најавуваната такса од 7 евра за електронска дозвола за влез, Европската комисија објави дека цената ќе биде речиси тројно повисока – 20 евра по апликација. Оваа дозвола ќе важи три години и ќе биде задолжителна за сите државјани од земји кои не се членки на ЕУ, меѓу кои и за македонските граѓани.
Како главна причина за зголемувањето на цената, комисијата ја наведува инфлацијата и дополнителните трошоци за воведување на нови технички функции во системот.
Иако овој систем ќе се применува од втората половина на 2026-та година, веќе претстојната есен, во октомври, почнува имплементацијата на системот за – влез/излез, што ќе биде првиот чекор кон новиот режим за влез во Шенген-зоната.
Новина е што при влез ќе се бараат биометриски податоци – отпечатоци од четири прсти и фотографија, кои ќе се зачуваат во дигитална евиденција. Системот ќе се применува на сите гранични премини на земјите-членки на Шенген-зоната, како и на Бугарија, Хрватска и Романија.
Новите правила ќе важат за сите државјани од Западен Балкан, вклучително и за македонските граѓани. ЕУ ги оправдува новите мерки со потребата за зголемена безбедност, подобра контрола на движењето и намалување на злоупотребите на туристичкиот престој.
