Во Македонија се развива нафтен туризам. На граничниот премин „Меџитлија“ бројни возила кои, освен што доаѓаат да си ги наполнат своите резервоари на пограничните македонски бензински пумпи, не се ретки и оние кои пазаруваат во маркетите. Избегнувајќи да говорат во камера, зад камерите ни рекоа дека овде им било поевтино и горивото, но и некои други прехранбени производи, па затоа и се одлучувале на овој чекор. Цената на горивата во земјава останува и понатаму најниска во регионот и таа се движи од 86,50 ден./лит до 88,50 ден./лит за бензините и 92 ден./лит за дизелот, наспроти цените во Грција, каде бензините се продаваат од 1,81 – 1,98 евра за литар, додека дизелот достигна цена до 1,70 евра за литар.
За разговор во камера не беа расположени ни од пограничните бензински пумпи. Но, она што успеавме да го дознаеме од разговорот со нив е дека, и покрај напливот на странци кои точат гориво кај нас, место за загриженост нема. Гориво има доволно, велат тие, а се почитуваат и сите препорачани мерки од Владата.
Инаку, со сите овие мерки од Владата, горивата во Македонија и понатаму се продаваат по најниски цени во регионот. Колку за споредба, бензините во соседна Србија се продаваат од 1,55 евра до 1,69 евра, а дизелот за 1,71 евро. А во Албанија, пак, по 1,68 евра се продава и литар бензин, и литар дизел. Според премиерот Мицкоски, засега не се предвидуваат мерки за рестрикција на продажбата на горива за странците.
