Полска привремено затвори два аеродрома и превентивно крена борбени авиони, откако Русија изврши голем воздушен напад врз Украина. Аеродромите во Лублин и Жешов, кои се наоѓаат близу границата со Украина, повторно беа отворени откако заврши операцијата.
Украинскиот претседател Володимир Зеленски изјави дека Русија лансирала повеќе од 400 дронови и околу 40 проектили од различен тип. Мета на нападот биле електричната мрежа, производствени постројки и дистрибутивни трафостаници.
„Москва мора да биде лишена од можноста да го користи студот како средство против Украина“, кажа Зеленски.
Министерот за енергетика на Украина изјави дека биле погодени две термоелектрани во западните региони на Украина и основни елементи за дистрибуција на електрична енергија.
Руските напади врз енергетската инфраструктура на Украина се случуваат во период кога се очекува температурите да паднат до минус 19 степени.
