Седумнаесет лица се уапсени, а запленети се повеќе луксузни автомобили, голема сума пари, девизи и денари, како и одредена количина дрога. Ова се првичните неофицијални информации за исходот од денешната голема полициска акција, која МВР и ОЈОГОКК уште од раните утрински часови ја спроведоа во Скопје, Струга и Прилеп. Во Прилеп беа извршени претреси на околу 30 локации во градот и на поширокото подрачје. Операцијата е координирана и е дел од поширока истрага насочена кон сомнителна организирана криминална група, во која, според првичните неофицијални информации, можно е да биле вклучени и лица од полициските структури, кои, исто така, се под лупа на истрагата.
По ова, во градот веќе на големо се шпекулира за тоа кои можат да бидат осомничените приведени лица, зашто, како што велат прилепчани зад камерите, во Прилеп е јавна тајна кој сè се занимава со овој вид „бизнис“. Согласно со тоа, а и бидејќи акцијата сè уште е во тек, официјалните информации кои треба да следат од надлежните институции што ја водат истрагата ќе покажат дали станува збор за една од поголемите полициски операции во Прилеп во последниве години, поврзана со оваа сериозна проблематика.
