Снабдувањето со електрична енергија во земјава е стабилно и покрај тоа што веќе неколку дена, најголемиот производител на струја – РЕК Битола е надвор од мрежата. „Ова се постигнува преку ТЕ „Осломеј“, зголеменото производство од хидроелектраните на АД ЕСМ, како и преку балансираната набавка и продажба на електрична енергија преку МЕМО“, информираат од ЕСМ, откако по неодманешниот сомнителен пожар во РЕК Битола заради активирање на заштитниот механизам, автоматски беше исфрлен од мрежа Блокот 2, а кој единствено беше во погон.
„Во врска со континуираните дрски и лажни обвинувања од СДСМ – уништувачите на македонскиот енергетски систем, ја информираме јавноста дека „Техно Коп Плус“ ДООЕЛ Битола е избраната Компанија за технолошко чистење, откако ги исполнила сите наведени критериуми по Јавниот повик. Овој понудувач, понудил за 30% пониска цена од досегашната. Иако одлуката е донесена, договорот сè уште не е потпишан поради тековната жалбена постапка и истиот ќе биде склучен по истекот на овој период. Во однос на испадот на Блок 2 од мрежата, сакаме повторно да нагласиме дека немаше хаварија, туку извесно е дека ни се случи саботажа. Целиот настан во моментов е предмет на истрага од надлежните институции“, реагираат од АД ЕСМ.
Во меѓувреме, додека технолошкото чистење од надворешни изведувачи е во прекин, се преземаат проактивни мерки за внатрешно справување со сите отворени прашања во Комбинатот, а кој подолго време го „тресат“ бројни финансиски афери, но и веќе започнати судски процеси, како што е и предметот „Адитив“ во кој се осомничени дури 30 лица за проневера од 6,5 милиони евра.
Што се однесува пак, до повторното ставање во функција на постројките, од АД ЕСМ уверуваат дека во Комбинатот се вложуваат максимални напори за оспособување на Блок 2 и Блок 3. Очекувањата се дека и двата блока за многу кратко време ќе бидат спремни за синхронизација на мрежата.
А кој од нив ќе влезе, ќе одлучи раководството на РЕК Битола. Но, она што е клучното во овој момент е дека во овој период, заради обемот на конзумот, нема потреба да бидат активни два блока, децидни се од АД ЕСМ.
Инаку, пред неколку дена и премиерот Мицкоски потврди дека додека сегашната Влада продолжува да го оправа сето она кое што било уништено, распаднато и девастирано во последниве години во РЕК Битола, струја ќе има доволно за сите, а и нејзината цена ќе остане непроменета.
