Шеснаесетгодишниот мандат на Виктор Орбан во Унгарија заврши вчера, со изборниот пораз на неговата партија Фидес. Неочекувано високата излезност на изборниот ден, која достигна малку под 80 проценти, на крајот излезе во полза на новоформираната десничарска партија „Тиса“ на Петар Маѓар, која убедливо победи на изборите.
Со обработени 97 проценти од гласовите, Тиса освои 138 места во унгарскиот парламент, додека Фидес има 55 (шест места ќе освои десничарската партија „Ми Хазанκ“). Тиса ќе има неколку пратенички места повеќе од потребното за двотретинско мнозинство, со кое ќе може да смени голем број функционери во судството и регулаторните тела.
Бргу по објавувањето на првичните резултати, премиерот Виктор Орбан им се обрати на своите поддржувачи и го призна поразот.
-Изборниот резултат е болен за нас, но е јасен. Граѓаните не ни ја дадоа одговорноста и можноста да владееме и затоа и честитав на победничката партија. Два милиона и петстотини илјади гласачи ни ја изразија довербата. Да им испратиме порака дека никогаш нема да ги изневериме. Во изминатите 30 години сите ние тука поминавме низ многу тешки и лесни мигови, убави и тажни години, и сите во оваа соба и во целата земја знаат дека никогаш нема да се откажеме. Никогаш, никогаш не се откажуваме, порача Орбан на собирот на партиското раководство и поддржувачите.
Шефицата на Европската комисија, Фон дер Лајен, порача дека „Унгарија ја одбра Европа“.
Ова е вторпат Орбан да ја напушта позицијата премиер на Унгарија – неговиот прв мандат траеше од 1998 до 2002 година, а по осум години во опозиција, Орбан се врати на власт во 2010 година и се одржа 16 години, во текот на кои стана водечки десничарски лидер во Европа.
Маѓар ја предводи централно-десничарската партија Тиса, која освои импресивни 30 проценти од гласовите на европските избори во јуни 2024 година, завршувајќи веднаш зад Фидес.
