Петчасовните разговори помеѓу Владимир Путин и американските преговарачи во Москва не донесоа напредок во склучувањето на мировен договор за Украина. Портпаролот на Кремљ, Дмитри Песков, изјави дека разговорите биле конструктивни, но дека некои делови од предложениот план се неприфатливи за Русија.
Американската страна ја претставуваа специјалниот пратеник Стив Виткоф и зетот на Трамп, Џеред Кушнер, кои досега не се огласија за разговорите.
Путин претходно порача дека измените предложени од Украина и нејзините европски сојузници се неприфатливи, додавајќи дека „ако Европа сака војна, Русија е подготвена“.
„Со некои точки се согласивме, но некои работи ги критикувавме. Некои американски предлози изгледаат повеќе или помалку прифатливи, но за нив треба да се дискутира. Некои од формулациите што ни беа предложени не ни одговараат. Сè уште не сме смислиле компромисна верзија. Претстои многу работа“, изјави советникот за надворешна политика на Кремљ, Јури Ушаков.
Тој додаде дека нова средба Путин-Трамп во моментот не се планира, но постојат големи можности за економска соработка помеѓу САД и Русија.
