Националната федерација на фармери (НФФ) денеска ќе го одржи Генералното собрание, на кое ќе учествуваат претставници на земјоделскиот сектор, институциите, меѓународните партнери и граѓанските организации со цел да се разгледаат актуелните предизвици и можности за развој на малите земјоделци и производители од руралните средини.
Како што соопштија организаторите, предвидени се обраќања на Цветан Трипуновски, министер за земјоделство, шумарство и водостопанство, Стеванче Јорданоски, претседател на Националната федерација на фармери, Микаел Атерхог, раководител за развојна соработка во Амбасадата на Шведска во Македонија, како и Сашо Ангеловски, национален менаџер на We Effect Европа.
Во рамки на настанот ќе се одржи и панел-дискусија на тема „Успешни приказни и пазарни можности за малите земјоделци“, на која ќе бидат презентирани резултатите од проектот „Организациски развој на НФФ и подобрени врски на пазарот за малите земјоделци и производители од рурални области со цел зголемување на приходите“, поддржан од Шведска и од шведската организација за развој We Effect.
Панелот ќе понуди конкретни примери за успешни земјоделски иницијативи и модели на развој. Пере и Рахела Транталовски од „Трантал Фарм “/ „Преспино“ ќе ја споделат приказната за развојот на нивното производство – од локална иницијатива до препознатлив бренд на свежо цеден сок од јаболко, а Ванчо Кироски од невладината организација „Меден Исток“ ќе говори за школата за пчелари и можностите за вклучување на малите оператори во саемски манифестации.
Во рамки на дискусијата, претседателот на НФФ ќе го претстави моделот на договорно производство како ефикасен механизам за обезбедување сигурен пласман и стабилни приходи за земјоделците, со конкретен пример од производството и пласман на пченица.
