Двајца од 15-те повредени во пожарот во Кочани, кои се хоспитализирани во Бугарија, се ослободени од респиратор, еден е на маска за кислород, а останатите се во тешка, но стабилна состојба, информираше попладнево прес-службата на бугарското Министерство за здравство.
Екстубаираните пациенти, како и пациентот кој е на маска за кислород, се хоспитализирани во Универзитетската болница за активно лекување и итна медицина „Н.И. Пирогов“ во Софија. Останатите шест пациенти во оваа болница се уште се на механичка вентилација.
Тешка, но стабилна, е состојбата на тројцата повредени кои се хоспитализирани во болницата во Варна, како и на тројцата во Универзитетската болница „Свети Ѓорѓи“ во Пловдив.
Пациентите беа пренесени пред неколку дена во Бугарија со воен транспортен авион „Спартан“ и со амбулантни возила на софиската Итна медицинска помош.
Повредените во Бугарија беа посетени вчера од шефот на македонската дипломатија, Тимчо Муцунски, и министерот за здравство, Арбен Таравари.
