Отпадот не е само ѓубре, туку е ресурс од кој може да се произведе некој друг ресурс, а со тоа да се создаде циркуларна економија. На депониите, според оваа економија, ќе се фрла само оној отпад кој не може да се рециклира – велат од Македонската асоцијација за управување со отпад. За таа цел, велат, треба што поскоро да се отворат регионалните центри за отпад, но и да се обучи кадар кој ќе може ефикасно да управува со нив.
„Прилично касниме со регионалните центри за отпад. Требаше да бидат завршени пред повеќе од една деценија, но сега е критично добар момент. Како држава имаме солидна поддршка од донатори и од Европската Унија. Управувањето со отпадот е инвестиција во здрава животна средина, за здравјето на граѓаните, а и за нашата економија“, изјави Михаил Матески.
Управувањето со отпадот, додаваат, е инвестиција во здрава животна средина, во здравјето на граѓаните, а и за нашата економија.
„Најслаби сме во делот на комуналниот отпад и за таа цел мора да се подигне капацитетот на јавните комунални претпријатија, но фалат луѓе, знаење и оперативна техника. Со поддршка на државата, на Министерството, и ние како струка да фатиме чекор и да ги отвориме што побрзо регионалните центри за отпад и да го следиме трендот на европските држави“, изјави Михаил Матески.
Министерот за животна средина Муамет Хоџа вели дека овој систем треба конечно да стави крај на дивите депонии и застарениот начин на третман на отпад.
„Стотици илјади тони комунален отпад се создаваат на годишно ниво, а стапката на рециклирање и селекција е на многу ниско ниво. Затоа моделот на циркуларна економија е тој кој што и ќе го реши проблемот со отпадот, а и ќе биде извор на енергија“, изјави Муамет Хоџа – министер за животна средина.
Целта на денешната дискусија на Асоцијацијата за отпад е да се разменат искуства со експертите и претставниците на институциите, бизнис-секторот и академската заедница, за да се истакнат придобивките на циркуларната економија за економскиот развој на земјава, а и заштитата на животната средина и општеството.
