Откупувачите на оризова арпа да покажат солидарност и родот од овогодинешната реколта да го откупуваат по разумна цена, алармираат оризопроизводителите од кочанскиот регион. Тврдат дека откупувачите ја злоупотребија новата владина мерка со која се предвидуват дополнителни 6денари за килограм арпа.
„Кога бевме во Министерството за земоделство, начално направивме договор, откупната цена да не е под производната односно 27 денари. Меѓутоа трговците, како и секоја година, тие 6денари што ги даде Министерството за земјоделство, за толку ја симнаа цената„ изјави Тони Максимов, од Националната мрежа на земјоделци.
„Јас епелирам до сите откупувачи, да бидат малку солидарни и барем 1 до 2 да ја покачат откупната цена . Тогаш земјоделците ќе бидат задоволни . Со оваа динамика, очекувам 50% од овогодинешната реколта да остане. И благодарам на државата, вакви субвенции досега не сме имале. 6денари по 600кг, тоа се 3600 и редовните, со нив излегува околу 9денари по килограм„ изјави оризопроизводителот, Здравко Арсовски.
Годинава е произведено околу 24 илјади тони оризова арпа и според калкулациите на земјоделците се претпоставува дека е откупено само 40% .. Поситните семиња се откупуваат по цена од 21 и 22 денари, додека за поедрите цената е малку повисока.
„Откупот е многу мал , дури може да се каже дека и нема откуп. Се уште калкулират со цените…. јас сметам дека барем треба да се држат до производната цена , 27денари за оризова арпа„ изјави Стојче Ташовски, од Националната мрежа на земјоделци.
Кон средината на февруари се очекува да започне откупот на ориз за стокови резерви, а за да се ублажи кризата минатата недела се донесе нова мерка, со која се предвидуваат субвенции од 6денари по килограм откупена арпа. Истата ќе биде со важност од 1ви ноември до 31 март 2025.
