Околу 99 проценти од тутунот од ланската реколта е веќе откупен. А редовно се врши и исплатата од страна на 10-те лиценцирани откупувачи по просечна откупна цена од близу 420 денари. Станува збор за квалитетен и солидно платен род, велат тутунарите, што пак ги подгрева надежите дека годинашната реколта ќе бележи раст за 10-тина проценти зголемено производство.
„Годинава се откупени 26.072 милиони килограми. А за оваа година предвидуваме негде околу 28–29… За среќа на тутунопроизводителите, заради тоа што се задоволни од постигнатите цени – се купи тутунот без одбиток, 99 посто им е исплатен во целост, така што покрај субвенциите што ги има по килограм, ги има и субвенциите по површина и зелена нафта, така што ако ги земеме како заедничка мерка, негде доаѓа приближно како ланската година – 100 денари субвенција по килограм тутун“, изјави Кире Ристески, претседател на Сојуз на тутунски здруженија.
Откупот на тутунот законски завршува со крајот од месецов, по што ќе започне и потпишувањето на договорите за претстојната производна сезона, заради што периодов активно се преговараше и околу новите откупни цени.
„Некни ги завршивме преговорите со сите откупувачи на тутун и ние излеговме со начелен заклучок и со наши цени кои во моментов што ги понудивме се 510 денари за прва класа, 460 за втора класа и 400 денари за трета класа. Тоа е под услов ако купуваат по класи. Меѓутоа, до 20.02. ќе треба да нè известат за цените. Ако не ги прифатат нашите цени и ако излезат со нивни цени, тогаш ќе сметаме дека и од наредната година ќе се откупува тутун само во прва класа“, дециден е Ристески.
Тутунопроизводителите новите договори ќе можат да почнат да ги склучуваат од први март и ќе бидат во согласност со претходно договореното околу откупните цени. Исто така, според Ристески, на последните средби во Министерството било разговарано и да се донесе календар за исплаќање на субвенции, кој би одел квартално, односно субвенциите да се исплаќаат на секои четири месеци, како би се избегнало доцнењето во исплатата, а што низ годините е честа појава, особено во сточарството, лозарството и овоштарството.
