По осум денари дополнителна поддршка по килограм и нова производна цена – ова се двете барања кои оризопроизводителите му ги доставија на ресорниот министер на последната средба. Пред стартот на новата жетва, бараат по 48.000 денари по хектар за новата реколта, а најдоцна наредната недела да биде утврдена и нова производна цена, која, според нив, не смее да биде под 35 денари. Велат дека сегашните трошоци за репроматеријали и механизација не им овозможуваат ниту да ги покријат основните вложувања.
„И да се направи нова производна цена, затоа што нафта, препарати, ѓубрива се покачени, така што ние бараме новата производна цена да не е испод 35 денари и врз база на тоа, откупната цена да биде 50% над производната. Така што не само да преживуваме, туку и ние малку да живееме. Министерот вети дека целото тоа ќе биде прифатено“, изјави оризопроизводителот Здравко Арсов.
По средбата со ресорниот министер, оризопроизводителите очекуваат нивните барања да бидат прифатени и да се започне со реализација. Арсов посочува дека поради временските услови им претстои неизвесна жетва, што ќе се одрази и врз приносите. Според проценките, од еден декар би требало да добијат меѓу 300 и 350 килограми оризова арпа.
Во Кочанско годинава се засеани околу 4.000 хектари. Доволните количества вода во браната „Калиманци“ овозможија навремено наводнување на земјоделските површини од Виничко до Овче Поле.
