Унгарскиот премиер Виктор Орбан свика итен состанок на Советот за одбрана на земјата, по веста од соседна Србија, која ја соопшти лично претседателот Александар Вучиќ, дека во близина на гасоводот што ги поврзува двете земји и ја снабдува Унгарија со руски гас, кај општина Кањижа е пронајдена голема количина експлозив. Орбан, по состанокот на Советот за одбрана, објави дека воените сили што го штитат делот од гасоводот „Турски тек“, што се наоѓа во Унгарија, ќе бидат дополнително зајакнати.
Во видео објавено на неговиот Фејсбук профил, Орбан му се заблагодари на претседателот на Србија, Александар Вучиќ, за неговиот „брз и ефикасен одговор“. Унгарскиот премиер додаде дека во тој инцидент нема повредени и дека е спречен „акт на саботажа“.
