Унгарскиот премиер Виктор Орбан денеска го потврди цврстото противење на заемот од 90 милијарди евра (103 милијарди долари) наменет за Украина, како и против новите санкции кон Москва, откако лидерите на Европската Унија не успеаја да го убедат да го промени својот став за време на самитот во Брисел.
Орбан категорично ја отфрли можноста за повлекување на ветото сè додека не биде обновен транзитот на руска нафта низ Украина преку нафтоводот „Дружба“.
– Никогаш нема да поддржам каква било одлука што е во корист на Украина. Унгарската позиција е многу едноставна – подготвени сме да ја поддржиме Украина кога ќе ја добиеме нашата нафта која е блокирана од нивна страна – изјави Орбан на маргините на состанокот, нагласувајќи дека ова не е политичка игра, туку прашање на опстанок на унгарското стопанство и домаќинства.
Снабдувањето преку овој нафтовод беше прекинато во јануари, по руски воздушен напад кој, според Киев, предизвикал штети кои не можат брзо да се санираат, додека Будимпешта се сомнева во ваквите тврдења и бара итна поправка.
И покрај отпорот на Унгарија, кој е поддржан и од словачкиот премиер Роберт Фицо, преостанатите 25 земји-членки на Унијата излегоа со заедничка изјава во која се вели дека „со нетрпение ја очекуваат првата исплата за Украина до почетокот на април“, како што беше претходно планирано. Овие средства се клучни за покривање на финансиските потреби на Киев до крајот на 2027 година.
Доколку блокадата продолжи, земјите-членки теоретски би можеле да обезбедат индивидуални гаранции наместо да го користат заедничкиот буџет на ЕУ, за што е потребен консензус.
Украинскиот претседател Володимир Зеленски, обраќајќи се преку видео-врска, го изрази своето разочарување, истакнувајќи дека поддршката е критична за заштита на животите и дека блокирањето на 20-тиот пакет санкции го намалува притисокот врз Русија за постигнување вистински мир.
Наглиот пресврт на Орбан, кој првично го одобри заемот на самитот во декември, предизвика голем гнев меѓу европските лидери, кои неговото однесување го сметаат за неприфатливо и мотивирано од претстојните парламентарни избори во Унгарија во април, посочува германската агенција ДПА.
Германскиот канцелар Фридрих Мерц, алудирајќи на промената на курсот на Будимпешта, потсети дека принципот на работа во ЕУ се заснова на „лојалност и доверливост“.
Претседателот на Европскиот совет, Антонио Коста, кој претседаваше со состанокот, според дипломатски извори, директно му порачал на Орбан дека таквото негово однесување е надвор од сите европски стандарди.
