Општина Македонска Каменица продолжува со реализација на инфраструктурни проекти насочени кон подобрување на патната мрежа во населените места, со цел обезбедување поквалитетни услови за живот и побезбедно одвивање на сообраќајот.
Во својата објава на Фејсбук, градоначалничката Соња Стаменкова денес информираше дека во село Костин Дол успешно се завршени активностите за санација на оштетувањата на коловозот, рехабилитација и асфалтирање на дел од локалниот пат во должина од 220 метри.
Според неа, со реализацијата на овој проект значително се подобруваат условите за безбедно движење на возилата и пешаците, но и секојдневното функционирање на жителите на селото.
Истовремено, започнати се и градежните работи за изградба на патот кон месноста Папурица, проект кој локалната самоуправа го оценува како особено значаен за подобрување на пристапноста и создавање подобри услови за развој на овој дел од општината.
Покрај тековните активности, од Општината најавуваат и нови инвестиции во патната инфраструктура. Во тек се подготовките за распишување јавна набавка за реконструкција на патниот правец од влезот во село Луковица до маало Чорбаџиите, со што дополнително ќе се подобри поврзаноста меѓу населените места и ќе се овозможат поквалитетни услови за движење на жителите.
-Рамномерниот развој на сите населени места останува наш приоритет. Продолжуваме одговорно, домаќински и посветено да инвестираме во проекти што носат конкретни резултати и трајни придобивки за граѓаните на Општина Македонска Каменица- истакнува Стаменкова во објавата на фејсбук.
Од локалната самоуправа посочуваат дека инвестициите во патната инфраструктура ќе продолжат и во наредниот период, како дел од стратешките определби за подобрување на условите за живот, зголемување на безбедноста во сообраќајот и рамномерен развој на сите урбани и рурални средини во општината.
