Општина Карпош ги опреми десетте основни училишта на своја територија со фотоволтаични централи што произведуваат електрична енергија за свои потреби. Локалната самоуправа ја реализираше оваа иницијатива, откако претходно ја реновираше и кровната конструкција на сите училишни установи, се наведува во денешното соопштение на Општина Карпош.
– Во случајов, училиштата и детските градинки во Карпош се енергетски ефикасни објекти, со оглед на тоа што истите имаат поставено термичка изолација, прозорци со трослојно стакло, а некои од нив се загреваат на системи од обновливи извори на енергија, се додава во соопштението.
Воедно, како што се истакнува, Општина Карпош е првата локална самоуправа во нашата држава што постави хибридни колектори на детската градинка „Мајски цвет“ во Тафталиџе 2, што служат за производство на електрична енергија и топла вода.
– Поточно, овие колектори произведуваат струја со моќност од 3,2 киловати, а преку искористување на сончевата енергија се произведуваат и 300 литри санитарна топла вода, што се користи за потребите на кујната на оваа детска установа. Според планираната динамика, Општината ќе ги опреми и останатите детски градинки, што заедно со основните училишта ќе бидат енергетски ефикасни и финансиски одржливи институции, се подвлекува во соопштението на локалната самоуправа.
