Општина Аеродром денеска официјално почна пилот-проект за системска селекција на пластичен отпад од домаќинствата. Во првата фаза ќе бидат опфатени 50 домаќинства, а во наредните фази ќе бидат опфатени вкупно 600 домаќинства кои ќе селектираат отпад од дома.
Проектот го промовираа градоначалникот на Општина Аеродром Дејан Митески и министерот Златко Перински во населба Лисиче.
Министерот Перински изрази задоволство од реализацијата на овој проект „Чист Аеродром“, што се спроведува во рамки на програмата „ЕУ за општините“. Оваа програма, како што рече, е потврда за успешната соработка на Владата, претставувана од Министерството за локална самоуправа, Швајцарската амбасада и Делегацијата на ЕУ во Македонија.
– Во рамки на овој проект, една од активностите беше набавка на ова специјализирано возило за селектираниот отпад од домаќинствата. Поставивме 11 вендинг машини во сите основни училишта на територија на општина Аеродром и во две градинки. Направена е едукација на најмалите за селекција и одлагање отпад, што е императив на овој проект, изјави Перински.
Тој изрази надеж дека и во иднина ќе изнаоѓаат можности за да се реализираат вакви проекти за заштита на животната средина.
Градоначалникот Митески информира дека општина Аеродром нуди комплетната услуга, доделува канти кои ги имаат добиено како донација од Министертството за животна средина и просторно планирање.
-Притоа набавено и електрично возило кое ќе биде ставено во функција на собирање на пластичниот отпадот преку проектот „Clean AirDrom“, што беше поддржан од Делегацијата на ЕУ и Министерството за локална самоуправа и Швајцарската амбасада. Со ова го заокружуваме комплетно процесот за пилотирање на проектот за селекција на отпад од домаќинства, изјави Митевски.
Потенцира дека Општина Аеродром е првата скопска општина која во целост, со сопствени капацитети преку ЈКП ја нуди оваа услуга на граѓаните.
