Охрид денеска ќе биде домаќин на „Денот на спортот“ и спортско-едукативниот проект „Zero Waste“ во рамки на Плазма Спортските игри за млади, кои годинава за првпат се одржуваат во Македонија.
Настанот ќе се одржи на Кеј Македонија со почеток во 10 часот, а на свеченото отворање предвидено е обраќање на претседателката на Плазма Спортските игри за млади во Македонија, Елена Мицковска, градоначалникот на Охрид, Дејан Пецаковски и директорката на мрежа експозитури на Шпаркасе Банка во Охрид, Билјана Вранишкоска.
Како што стои во соопштението на организаторите, на „Денот на спортот“ ќе присуствуваат и повеќе познати спортисти од Охрид, меѓу кои поранешниот фудбалер Драган Бочески, боксерот и македонски репрезентативец Наум Стојаноски и капитенот на ГРК Охрид, Иван Тасески, кој со својот тим сезонава го освои ЕХФ Европскиот куп.
Охрид е третиот град во кој ќе се реализира проектот „Zero Waste – Бидете дел од играта – Да ја заштитиме нашата планета“, по претходните изданија во Прилеп и Битола. Проектот е создаден во соработка со компанијата „Coca-Cola“ и има за цел преку спорт и интерактивни активности да ги едуцира децата и младите за одржлив развој и заштита на животната средина.
– Во рамки на програмата ќе се организира едукативен квиз за прашања поврзани со одржливиот развој, како и практични активности за селектирање отпад преку спортски полигон. За најуспешните учесници се предвидени награди. Младите учесници ќе имаат можност да се натпреваруваат во повеќе спортски дисциплини, меѓу кои Coca-Cola Cup за генерација 2011, фудбал за генерација 2015, ракомет, баскет 3х3, одбојка и народна игра – стои во соопштението.
Организаторите ги повикуваат децата, родителите, наставниците и граѓаните да бидат дел од спортскиот настан. По Скопје, Куманово, Штип, Кочани, Струмица, Велес, Кавадарци, Прилеп и Битола, Охрид е десеттиот град домаќин на Плазма Спортските игри за млади во Македонија.
