Националната установа, Центар за култура Куманово го одбележува патронатот денеска го одбележува 6 ноември, денот на раѓањето на композиторот и диригент Трајко Прокопиев, еден од основоположниците на современиот македонски музички живот.
Прокопиев е роден во Куманово на 6 ноември 1909 година. Тој е еден од основоположниците на современиот македонски музички живот. Музичкото образование го стекнал во Белград, а го усовршувал на Прашкиот конзерваториум. По ослободувањето активно се вклучил во изградбата и развојот на македонските музички институции. Тој бил директор на Средното музичко училиште во Скопје, диригент на Радио Скопје, Македонската опера и Филхармонијата, а од 1958 до 1964 година ја раководел Националната установа „Танец“.
Неговиот творечки опус опфаќа хорски, камерни, оркестарски и музичко-сценски дела. Меѓу најпознатите се циклусот „Кумановки“, инспириран од музичкото и фолклорното наследство на родниот крај, балетот „Лабин и Дојрана“ и оперите „Разделба“ и „Кузман Капидан“. За придонесот во музичката уметност добил бројни признанија, меѓу кои и наградата АВНОЈ во 1977 година. Починал на 21 јануари 1979 година. Од НУЦК „Трајко Прокопиев“ посочуваат дека патронатот е потсетник на мисијата на установата да ги негува уметничките вредности и традицијата и да создава простор за новите генерации творци и уметници.
– Патронатот не е само ден на сеќавање, туку и потсетник на нашата мисија – културата да живее, да се развива и да ги поврзува луѓето-наведуваат од установата.
