Македонија против корупцијата – транспарентност, отчетност и праведен и одговорен систем, тоа се целите на Националната стратегија за спречување корупција и акцискиот план кои беа донесени на 34-тата седница на државната комисија. За постигнување на овие цели предвидени се низа мерки и активности како и голема финансиска поддршка која вкупно ќе чини 216 милиони денари, а опфатени се повеќе области:
„Националната стратегија 2026 – 2030 ќе биде ориентирана кон визијата на ДКСК и базирана на анализа на ризици и нивна класификација по хоризонтални области и сектори кои ќе бидат опфатени и тоа хоризонтални области: јавни набавки и надзор на спроведување на законите и сектори односно пет сектори: правосудство, здравство, транспорт и инфраструктурни проекти, урбанистичко планирање, просторно планирање и градежништво, животна средина, енергетика и природни ресурси“, изјави Адем Чучуљ, претседател на Државна комисија за спречување на корупцијата
За изработката на националната стратегија беа консултирани низа странски експерти а процесот траеше повеќе од година.
„ДКСК доби експертска поддршка од ЕУ ИПА 2020 проектот за владеење на правото компонента 3, борба против корупцијата, проектот заедници со интегритет, финансиран од владите на Швајцарија и Шведска имплементиран од НДИ, мисијата на ОБСЕ во Скопје и регионалната школа за јавна администрација РеСПА“
Со оваа стратегија Македонија јасно го трасира патот кон Европската Унија бидејќи во последниот извештај повторно европските челници ги нотираа веќе стандардните забелешки за Македонија – владеење на правото, независност на судството и клучното, борбата против корупцијата.
Бојан Таневски
