На Економскиот факултет при Универзитетот „Св. Кирил и Методиј” во Скопје денеска традиционално ќе се одржи одбележување на доделувањето на Нобеловата награда за економија за 2025 година.
Следејќи ја повеќегодишната традиција, Катедрата за Економија и оваа година го организира настанот „Нобеловци“ посветен на доделувањето на Нобеловата награда од областа на економските науки за 2025 година, која беше доделена на тројца истакнати економисти: проф. Џоел Мокир (Joel Mokyr) од Northwestern University, Evanston, IL, САД, и Eitan Berglas School of Economics, Tel Aviv University, Израел; проф. Филип Агион (Philippe Aghion) од Collège de France и INSEAD, Париз, Франција, како и од The London School of Economics and Political Science (LSE), Обединето Кралство; и проф. Питер Ховит (Peter Howitt) од Brown University, Providence, RI, САД.
Поздравно обраќање ќе има проф. д-р Даниела Бојаџиева, раководител на Катедрата за Економија, а настаното официјално ќе го отвори деканот на Економскиот факултет проф. д-р Мијалче Санта.
За значењето и за придонесот на нобеловата награда за економија за 2025 година ќе говорат академик Таки Фити, проф. д-р Владимир Филиповски, проф. д-р Љубомир Кекеновски и проф. д-р Сашо Ќосев.
