Македонските граѓани во иднина ќе патуваат со возови кои ќе достигнуваат брзина до 200 километри на час, но и по модерни автопати опремени со интелигентни транспортни системи. Македонија ги интензивира инфраструктурните инвестиции во железницата и патната мрежа, со цел побрзо и подобро поврзување со соседите и европските центри. Министерот за транспорт и врски Александар Николоски во Брисел ја претстави стратегијата за развој и модернизација на транспортната инфраструктура. Првата железничка делница на Коридорот 8 е завршена, втората е во изградба и треба да биде готова до крајот на 2028 година, а започната е и постапката за избор на изведувач за третата, која е и најтешката делница кон Бугарија.
„Минатата недела, повторно заедно со ЕИБ, ја започнавме постапката за набавка за избор на изведувач за изградба на третата делница – најтешката фаза од железничкиот коридор. Таа е со должина од само 23,1 километар, но 75 проценти од неа се објекти – над 20 тунели и 56 мостови, што покажува колку е тежок проектот. Таа минува зад еден пограничен град и влегува во заедничкиот тунел што ќе го градиме заедно со Бугарија“, изјави Александар Николоски – министер за транспорт и врски.
Паралелно се работи и на железничкиот Коридор 10, каде што се планира изградба на двоколосечна брза пруга за патнички возови со брзина од 160 до 200 километри на час, а за товарните возови до 120 километри на час. Побрзо и поефикасно треба да се одвива и патувањето преку граничните премини.
„Целосно ја менуваме сликата и на граничните премини со воведување зелени ленти и проширување на прекуграничните врски и со Албанија и со Бугарија. На Коридорот 10 работиме на првиот целосно дигитален автопат со воведување Интелигентен транспортен систем (ИТС) во соработка со ВБИФ. Пред три недели, заедно со колегите од Косово, започнавме нова автопатска врска – дел од Коридорот 6 од Скопје преку Приштина кон Драч и пристаништето Бар во Црна Гора, која очекувам да биде изградена за три години. Денес директорите на железничките компании од двете земји се состануваат во Приштина за заедничка железничка врска, а следната година би можеле да имаме меѓуградски воз Приштина-Скопје, кој ќе патува 50 минути“, изјави Александар Николоски – министер за транспорт и врски.
Во меѓувреме, се очекува набавката на 150 нови електрични автобуси, а во тек е постапка за пристигнување на пет електрични локомотиви и од пет до седум патнички возови. За десетина дена треба да започне и изградбата на автопатот Букојчани-Кичево.
