Народниот правобранител се приклучува кон одбележувањето на Меѓународниот ден за свесност за аутизмот, ден кој потсетува на важноста на разбирањето, прифаќањето и поддршката на децата/лицата со аутизам и нивните семејства.
-Аутизмот е спектар на состојби кои влијаат на начинот на кој лицата комуницираат, се поврзуваат со другите и го доживуваат светот. Секое лице со аутизам е уникатно, со свои способности, интереси и начини на изразување. Различноста не е пречка, туку богатство кое го збогатува општеството, се наведува во соопштението од Канцеларијата на Народниот правобранител.
Од институцијата апелираат кон создавање на инклузивни и безбедни средини, каде секое дете и секое лице со аутизам ќе може да се развива, да биде прифатено и активно да учествува во општествениот живот. Институциите и општеството имаат обврска да обезбедат еднакви можности за образование, здравство, социјална заштита и вработување, без дискриминација.
Народниот правобранител истакнува дека останува посветен на следење на правата на децата/лицата со аутизам и на укажување на институциите за потребата од конкретни и навремени мерки кои ќе обезбедат достоинствен и квалитетен живот за сите.
